唔係FA！又病！

唉！真係令我好沮喪，今年我都已經數唔出係第幾次感冒，今次仲要病得好甘......

 

話說星期五，有個響我背後坐既同事因病勁咳，雖然佢有帶口罩，但係幾十平方呎一間冷氣房，三個人焗住，又點會話唔危險？病毒濃度都高啲啦！更況病毒冇眼，俾佢揀中我，我都冇計，就算佢真係有眼，都唔會因為個樣靚啲、型啲就唔搞個喎，雖然我係。嗰個有病既同事，響間房咳咗一朝，然後下晝就放咗假鬆人。記得我嗰朝都仲好精靈架，中午仲同同事一齊去食韓國燒烤，估唔到下午放工都未行到巴士站，已經開始發燒......

 

一路坐車我已經辛苦到不得之了，番到屋企我直頭好似死咗咁上床攤屍。發燒、頭痛欲裂、腰骨及腳骨痛同埋沾寒沾凍，令我響床上好耐都瞓唔倒覺。太太幫我量體溫，發現升到39.8度，再差一啲就到40度，佢話如果升到40度就要入院。我成晚俾各種痛楚折磨，根本完全瞓唔著，體溫亦一路維持響39度左右，個身出汗出到連個床位都濕哂！第二朝我實在頂唔住，好夾硬沖咗個涼，老婆、阿仔就陪住我去咗睇醫生。醫生話係流感，俾咗三日藥我。我實呈好想打支針快啲退燒，點知醫生話感冒係Viral Attack打針都冇用。於是我番屋企，食藥，又燒咗一日，到傍晚體溫先至回落，真係好辛苦呀！跟住喉嚨又開始痛啦，oh no!! 晚上又瞓唔倒！結果我星期一、二都請埋假響屋企家休息。而家個頭都仲痛住來番工。

 

原本週末、週日，想備課及同仔仔玩通通都做唔倒，唉！我真係冇用，空有一副軀殼！