火燒巴士

今日係高考放榜，我晨咁早就去咗將軍澳，同一個學生去景嶺書院度擺攤收報名表。當我搭小巴就快到總站嗰陣，旁邊既學生驚叫話：「前面架車著咗火喎！」我立即睇睇，見倒一架大旅遊巴死氣喉嗰庶著咗小火，司機正係用滅火筒撲救，車上既乘客都慌忙落車，當時大概係9:08am。

由於我正趕入學校擺攤，所以冇理到架車點，諗住個司機用滅火筒救火應該整得熄。點知一上到學校三樓既圖書館，向外一睇，我就發現架旅遊巴既車尾已經燒到好猛烈，黑色既濃煙有成十層樓咁高。我即時用我嗰部低解像度手機拍咗段片，當時係9:15am。再過兩分鐘之後，整架旅遊巴已經變成一片火海，車頭玻璃爆開，火舌由頭嗰度冒出黎，非常恐佈。

記得唔係好耐之前，龍運巴士都試過燒到得番個架，今日睇過之後我發現原來啲火真係可以漫延得好快，短短10分鐘唔夠，整架巴士已經陷入火海之中。幸好大家疏散得快，冇人受傷。