離職前準備

照計Term break加上就黎離職，應該好得閑先啱架，點解成幾個禮拜都唔Update下個Blog呢？唉！一黎病咗幾個禮拜，二黎其實我都真係好鬼死忙，新校新課程要備課，一個星期兩科分兩晚授課，由於新手上路，需要多啲時間摸索，所以都幾吃力。不過最大既原因都係因為冇乜心情囉，要離開一個工作得幾開心既地方，心裡面都幾忐忑下。

呢兩個禮拜同事都以唔同既節目同我Farewell，包括晚飯暨紅白酒品嚐夜，午餐暨下午茶茶聚，任燒任食BBQ晚餐等等，聽日後日都安排左節目，呢度既同事真係有人情味。其實啲野都已經執得七七八八囉，好在星期六番一番黎執野，我總共Pack左四大箱野，又掉咗好多野，而家我個櫃同張書枱都可以用好空洞黎形容，不過之後阿Ricky會轉過黎坐，又會塞滿野架嘞。

雖然已經有Friend提醒過我，去到新地方就未必再有一班咁玩得既同事，不過同班新同事接觸過幾次都覺得佢地好Nice，冇理由要求一樣咁好玩既，可能會有第二啲精彩野呢！我覺得自己係一個可塑性幾高既人，我有信心响新環境應該可以適應得倒，求主俾我智慧同埋恩典。

計埋今日仲有三日，我會好好珍惜响呢度剩落黎既時間。