上網與潛意識

曾經聽一位同工講過，由於上網非常之方便，差唔多搵乜有乜，而且仲要即刻就有，所以上網係一個好能夠反映一個人潛意識既渠道。佛洛伊德當年就用左夢境、失語 (Freudian Slip)、自由聯想 (Free Association)等黎觀察人既潛意識，佢認為只要心理防衛下降，潛意識就好容易反映出黎。今時今日，好多人都可以有一個「安全」的地方上網 (譬如屋企、自己部電話等等)，防衛鬆懈左，心裡面想睇乜就睇乜、想寫乜就寫乜、想講乜就講乜。之前就有一個遼寧既女仔，因為全國哀悼日打唔倒機，所以不停鬧左啲地震災民4分幾鐘，結果搞到好多人好嬲，佢後來仲俾公安拉左添。唔係話用潛意識呢樣野幫佢開脫，不過你諗下佢講果段說話既時候，其實冇即時既聽眾，亦都即時冇人鬧佢，佢可以好安全咁講晒成段野；又有好多人，平日唔聲唔聲，好似冇野咁，但係可能成日睇埋啲色情變態既網站；又或者用Foxy偷窺下啲唔同機構外洩既個人私隱等等。平日響人面前唔會做既野，自己一個對住個腦既時候就會做晒出黎。

所以個人上網既習慣，睇啲乜野，上啲乜野Site，其實都幾反映一個人裡面有啲乜野......你上網又會做啲乜呢？