阿媽梗骨入院

我啲細路既嫲嫲，即係我阿媽葉老太，琴晚辛辛苦苦煮完餐飯，食左兩啖，就俾條唔大唔細既雞骨梗親，而且唔上唔落。我地個個都好緊張，雖然葉老太仍然行動自如，仲講倒野，但係佢個樣就變得越黎越辛苦，所以不消幾分鐘我地就決定送佢入急症室。結果醫生照倒條骨，要送佢上病房等做手術。佢琴晚好痛，成晚瞓唔倒覺。

今朝十點零鐘，醫生用內窺鏡嘗試同佢挾舊骨出黎，點之挾黎挾去都挾唔倒，搞到裡面損晒，最後條骨俾推左落去，雖然都係冇大件事，但係就好傷囉，睇黎佢食野都要痛一排囉。佢今晚好攰，番屋企冇幾耐就瞓左啦。

不幸中之大幸，真是恩典！雖然冇對住佢講，但係大家都心知，佢老人家係我呢一生人最親最尊敬既人。佢用血汗用心機養大我地兩兄弟，我地都未好好咁孝順佢，令佢生活舒服啲。我之前工作發展得唔係咁好既時候要佢老人家擔心，而家工作好啲，我又生完一個又一個咁請佢幫我湊，其實真係辛苦左佢。我結左婚，仲可以同阿媽一齊住，每日都可以食倒佢既飯餸，家人生活又融洽，真係好大好大既福氣黎架！多謝你葉老太，阿媽！

我要諗下點樣可以令阿媽生活得開心啲，我會好珍惜同阿媽一齊生活既日子！