再談電車男

點解仲要再講？因為電視台就來做；因為電影版同電視版我都已經睇晒；因為我幾鍾意個故事。我地成日都話虛擬網絡世界令人與人之間關係疏離，其實到今時今日，我都仍然覺得係咁。但係對於嗰啲隱閉青年或者御宅族來講，網絡世界就係佢地既全世界，係佢地緊閉既心靈開既一扇窗戶。呢類人或者係自卑又或者係憤世嫉俗，覺得其他人唔明白佢地，怕與其他人溝通，但係虛擬世界就係佢地暢所欲言既地方。

主角既改變，既係來自對「Hermes」小姐越發增長既愛慕，更係一群萍水相逢但係真誠相待既網友既不離不棄與支持。講穿咗就係愛情與友情既故事，係唔係好老土？係，不過呢兩樣野每一個人都好想有，但就唔係個個都搵得倒。正所謂橋唔怕舊，最緊要受，加埋愛情版Mission Impossible式既真人真事同埋大團圓結局呢啲元素，廣受歡迎都有佢既道理。

真誠同埋愛，無論響乜野地方、乜野環境都會拉近人既距離，影響人既生命。而家基督徒傳福音有好多不同既工具，有好多種方法，但係傳既人缺乏真誠同埋愛，咁同「鳴的鑼、響的鈸」又有乜分別呢？識得用心關懷、體諒、支持，就算響唔知道名字、聽唔見聲音既環境 (網際/留言版) 都係愛既傳遞場所，都係好禾場。