政治鴨曾蔭權

睇見曾蔭權大條道理講乜野「親疏有別」，我真係好想嘔。呢排我已經刻意唔去睇啲政治新聞，就算知都唔去諗，費事俾呢啲野刺激我既神經。不過見倒阿曾蔭權厚顏無恥大講「親疏有別」，我真係忍唔住！

由特區出現以來，大家都知道特首只不過係中央擺佈下既扯線公仔，阿爺話東佢唔敢話西，仲有阿爺響香港安設嗰啲乜野地區人士呀、商家呀、根正苗紅嗰啲咁既左仔工會要員呀、仲有嗰啲時時用大清律例做擋箭牌(原居民權利)既愛國鄉事背景人士呀等等，特首都要好似慰安婦或者做鴨咁安撫佢地(行政會、廣管局、乜乜物物委員會等)，同埋滿足佢地既權力需要。無他既，你做得呢個位就要咁架啦！但係你唔好俾人知你享受咁樣做吖碼！董建華其中一樣衰格既地方就係樂於慰安以上提及既嗰啲人，而且俾全世界知佢好享受同佢地天人合一，宜家上左神枱啦！同阿爺合一左嘞！

曾蔭權初初上台嗰陣，未掌握倒個慰安技巧，於是俾啲左仔係咁鬧，佢地又走上呀爺度告狀，好似阿衰鬼鈺成同素玉咁。阿曾特首為咗唔得失啲Client，於是又係咁安撫。人地搞簽名會呀、議員辦事處開幕呀，就扑倒去，仲好似老鴇咁帶埋成班跟佢搵食既(高官)過去撐場，真係核屎突。呢幾件事之後，我見倒阿曾蔭權似乎越來越Enjoy做鴨，用我細佬既分析：「開初就俾人逼良為娼，而家就狗上瓦坑」。而家仲高調企出嚟話乜野「親疏有別」，高調話俾人知佢係人地隻鴨，佢用咁誠懇同真摯既服務態度待佢要「親」既人，就梗係阿爺開心，班左仔放心啦！

記得佢初時出嚟選特首(大家都知唔係真係選啦，欽定既！)，職業一欄寫自己係政治家。算罷啦！充其量佢只係一隻低級既政治鴨！