今日又經歷一事，堂堂資深機構大牧，因為錢，響電話發我難喳，認真冇品。
事緣我機構響將要舉行既大會中安設咗書攤(五千幾蚊)同埋事工展覽(三千幾蚊)供各機構申請，某某機構由於遲報名，於是乎攞唔倒事工展覽位，只攞倒書展攤位。佢地起初冇問題噃，申請表填咗，錢又交咗，我地仲入埋票將收據寄俾佢地添。
跟住冇幾耐呢位大牧打電話來，話係機構既董事會主席。佢話機構人事有啲變動，工作崗位有變，所以想退出書展。照章則既規定就當然一毫子都冇得退啦，但係基督教機構有時冇乜原則可講，講愛心加嘛！你真係冇得退會俾人唱到你暈，話你商業化呀，冇愛心呀等等。所以我都同佢講話會同同工傾下點樣處理，睇睇會退幾多錢等等。當時佢既語氣都甚有禮貌，冇乜特別問題。
跟住我同同工商討，由於Waiting List既只有事工展覽機構，佢地都唔肯俾多二千蚊攞書展位，所以我地都認為由退出既機構承擔嗰二千蚊係對大家都公平既做法。所以我打電話俾阿大牧，同佢講我地既處理。正所謂唔講由自可，一講佢就扯火，佢話「只係二千蚊唔會影響倒我地機構之間既感情，但係你地機構咁樣處理法就好僵化，同好商業囉，如果你認為咁樣處理係冇問題既，我地就俾嗰二千蚊囉......係呀！我16號來你地機構開會，我會將你既處理方法講出來，你叫乜野名？你姓乜架？......好呀好呀！我會響開會既時候講呢件事出來。」先至聲明，我成個電話對談中都好有禮貌架，人地發難喳同冇品，我就冇法囉。其實響之前嗰間機構做野，同埋最近教會朋友既婚宴中，我都見過呢個大牧，初初印象都唔錯，點知原來係咁衰格既！
我驚唔驚佢講呢件事？你估我係善男信女咩！梗係唔驚啦！我最憎人屈我，佢真係敢叫我入埋會議室同佢玩，我一定同佢撐到行一行。真理要越辯先會越明。
一講到錢，無論係市井流氓定係大名頂頂既機構大牧，反應都係差唔多。總之講錢就失感情啦！
6 則留言:
Dear Jeffrey,
我諗如果個大牧用d溫和d嘅語調，即使佢老作話佢機構財政好緊，求下你機構幫手諗諗辦法等佢慳返二千幾蚊，比我都會嘗試幫佢諗計。但係我覺得佢問你名，同埋話會開會講就真係好似想兇你咁，好老土！唔通基督教機構講愛心就唔使講規矩？！佢都要尊重下其他機構嘅辦事規則掛？！
令我諗起d Professor呀；Dr.呀，郁下就問你名同埋話會搵你個Director，學歷與人格不成正比!
攪大佢...!
Jeffrey 叫你大佬出嚟同佢大佬三口六面拆掂佢,倾唔掂就做嘢...@XY ...*#$%...!
A....佢大佬又好似係你大佬喎...那麽大佬自有分數呢,將來必在天家行"家法",公道自在"神"心,不要與他一般見識,以惡報惡.
:>
Gary Kwok
*最近睇過套"黑社會2",所以人都粗老咗,請見諒!
聽見你的經歷 - 只好祈禱『大牧』能夠反省他的愛心往那裡去? 否則他將會由『大牧』變成『大鑊』! 求主憐憫!
"一上帝，就是眾人的父，超乎眾人之上，貫乎眾人之中，也住在眾人之內。"
"我往哪裡去躲避你的靈？我往哪裡逃躲避你的面？" 共勉之!!
謝謝各位的意見。其實收到電話後，我已經第一時間同大會副總幹事報案，交由「大粒佬」處理。副總幹事已經話會全數退款給「冇品大牧」以免多生事端云云，並會撰信一封與該「大牧」說明我們的處理手法。是的，機構很多時就是這樣，「有強權、冇公理」亦沒甚原則。
很難想像像這樣的牧者，有甚麼說服力叫職場的弟兄姊妹堅守立場，維持原則！
Jeffrey
我支持你! 爱心和公義是paralle 的.
Wow, 牧者是這樣, 難怪商場的人是那麽不擇手段, 靠大聲靠惡la.
Lisa
既然天下烏龜，不如留啖氣暖肚lor...
發佈留言