老年時...我們

老婆：

今日教完書真係好攰呀，班學生係咁「卒」我，問我篇Assignment 點做，上完堂我能量冇晒咁擠。我動作好慢咁行去巴士站，開始聽收音機舒緩下。一路坐巴士番黎果陣，俾我聽倒呢首歌，一首好耐之前已經聽過既舊歌，不過今日再聽，心境亦都更加近貼歌者，感覺好甜。

我一路聽，一路諗起我自己，又諗起你。我呢排多咗好多白頭髮啊！係唔係真係教書用神就會咁既呢？成日聽人講白頭到老，白頭到老......原來白頭到老係可以加速架！教下書就得架喇！你睇我依家就知啦！唔知到四、五十歲既時候，我會唔會已經成頭白晒呢？Anyway，我好開心可以同你白頭到老呀，亦都好想呢個願望可以成真。我好想到老既時候啲仔大晒，佢地有自己世界飛走晒既時候，仍然仲有你響我身邊陪住我同我一齊：陪我晨運行公園啦，陪我震震吓夜晚睇星啦，陪我開心，陪我傷心，陪我病，陪我好番(如果好得番既話)......咁你呢？你想唔想你老果陣，我喺你身邊陪你呀？到時你會唔係嫌我篤眼篤鼻架？笑...

不過老婆呀，點解你呢排咁辛苦番工湊仔，半夜都要爬起身，個樣仍然可以咁後生，一條白頭髮都冇既？我哋呢方面既步伐真係唔係好夾喎！喂！咪住先，咁咪得番我一個白頭到老囉？！唔公平呀！唔公平呀！

哈哈哈！算啦！無論你變成點都好，又或者冇乜點變都好，有你喺我身邊同我一齊過生活就足夠喇！將呢首歌送俾你啦！

老公

-------------------------
老年時
曲：盧冠廷/楊雲驃
詞：葉建華
編：鮑比達

老年時，頭髮甩晒鬚亦漸漸白，
問你會否仍然，癡纏，長伴我身邊
來日老年時，震震吓星月下踱步
問你會否仍然，叫我honey，同渡每一天

明白你今天的那俏臉，明日變化青春終失去
我仍真心，痴痴的一顆心，仍照舊
明日也許搬遷上月球，乘坐穿梭機一飛沖天去
攜手再行，漫步星空每天

唉…老年時，頭髮甩晒鬚亦漸漸白
問你會否仍然，痴纏，長伴我身邊，情懷未變

明白你今天的那俏臉，明日變化青春終失去
我仍真心，痴痴的一顆心，仍照舊
明日也許搬遷上月球，乘坐穿梭機一飛沖天去
攜手再行，漫步星空每天

老年時，頭髮甩晒鬚亦漸漸白
問你會否仍然，痴纏，長伴我身邊
來日，老年時，震震吓星月下踱步
問你會否仍然，叫我honey，同渡每一天，情懷未變