Happy Hour@HKU & Ivan the Kozak

琴日雖然好鬼攰，但係知道阿Ben 響港大為我地開左個紅酒局，我冇乜理由唔去架，所以一放工，第一時間就飛過去。我去到K.K.Leung十五樓個Staff Lounge既時候，阿Ben、Marian、Harry 都已經坐左響度飲緊野。我坐低飲番杯紅酒，食左啲Cheese之後，個人當堂醒番晒，「Red Wine Therapy」 真係 work 到震，哈哈！阿Ben跟住帶左我地去佢Office俾佢啲紅酒收藏我地欣賞，仲俾我地揀左一枝紅酒同一枝白酒響食飯既地方再飲。

星期五晚原來真係難訂檯到爆，打去好多間都話冇位，打到有啲有位既，個開瓶費就好鬼乸利，直至到阿Ben話去佢兩個星期前去過既一間餐廳，叫Ivan the Kozak，係食東歐菜既，一打電話去就有位，而且仲話之前應承過阿Ben 唔收開瓶費添，於是我地立刻起行，我老婆就帶埋個大仔去會合我地。食物既味道都唔錯，而且有啲好特別既野食，好似兔肉、鹿肉咁，不過佳餚唔能夠冇左美酒，阿Ben啲酒真係幾好飲，更加開心既係老闆Ivan餐後請我地飲Vodka。

以前都飲過啲含Vodka既Cooler，但係大口大口飲Vodka真係咁大個仔第一次。老闆話佢啲Vodka係直接由外國入口，香港其他地方應該冇得賣。佢仲話飲既時候最好一口氣飲落去，唔好慢慢飲。佢攞左四隻Vodka黎俾我地揀，我揀左一隻Plain，一隻Lemon既，飲左兩shot，每shot都一杯到尾。起初喉嚨覺得暖暖地，好舒服咁，跟住冇幾耐就開始感到啲酒精上腦，有啲「扔扔」地，坐左一陣間，傾下偈，冇幾耐又冇乜事。

阿仔好鍾意老闆儲酒既雪櫃，其實應該講係雪房至啱，因為裡面可以企6-8人都得，開放式，可供響裡面飲酒、影相。雪房門口放左好多俾客人穿著既皮草，阿仔入完一次又一次，最後老闆幫佢著左件皮草入裡面影相，好搞笑。

之後Harry再dare我入去雪櫃裡面飲多次，今次開左枝Currant味既，再黎兩shot，今次真係暈得一陣陣。食完飯番到屋企，好快就瞓著左。第二日起身暈足一日，哈哈！飲果下真係幾過癮，飲完暈一日又就真係唔係咁好受，所以話任何野過量都係唔好。追求快感一下子就完，之後辛苦好長既時間，咁樣同人生都好相似噃。