甚有得著

琴日風雨飄搖，放工其實最好就係番屋企休息下，陪下啲仔玩享受下天倫。不過琴日係我要番輔導中心當值既日子，雖然冇Case，有Case Conference，所以我都番去同同工一齊分析下Case，學習學習。不過Case Conference成9點先開始，以我為人咁「好學」(八卦至真)，冇理由嘥晒啲時間，所以過左去理工聽左個社工系搞既講座。好充實，因為學到野。

琴晚既講者係講點樣用Strength Base Perspective響有精神/情緒問題既青少年身上。講者比較左Deficit Perspective 同Strength Base Perspective 既分別，deficit嗰一面其實就係醫生或者一啲精神科醫生用既方法，從案主既病入手，強調要分辦精神病類別，離開正常生活環境、離開家人同伴接受治療等等，十分醫學性，有清晰既Protocol，有既定程序同評估，好快可以解決「眼前問題」，但係對案主就有好強既labelling，對案主既基本成長需要欠缺關懷；Strength Base既導向就好唔同，強調關心案主當時既成長需要，俾案主繼續響正常環境生活，希望家庭及其他生活圈子既成員，可以認識有關既精神同情緒問題，並且接納案主響相同既環境生活，希望案主可以透過認識自己既Strength並且適當咁去運用，黎適應環境既變化，不過Strength Base要用好多時間同心力，而且冇一套清晰既Protocol點樣做。

講者話雖然社工學既野近Strength Perspective 嗰邊多啲，但係好多時候就因為種種原因，社工都會放棄左自己既睇法同埋戰線，用左Deficit Perspective，除左因為呢一套真係好慳時省力之外，畢竟好多用緊呢一套方法既人，都係講說話有力啲同大聲啲既專業人士，譬如臨床/教育心理學家、普通科/精神科醫生呀咁。跟住講者分享左一啲佢自己用Strength Perspective處理過既好精彩既一啲Cases，當中俾我有啲反省。

其實教育工作者，都好容易落入咁樣既陷阱，用Deficit嗰一套黎處理學生，學生稍為有行為問題就評估、要睇醫生食藥，甚至要暫時停學。好多學生睇完醫生知道左自己既Label (思覺失調、抑鬱症等等)之後其實都好沮喪，然後再要佢離開正常生活環境既話咁就更加有好多傷害。老師可以將焦點放響認識學生既Strength上面並鼓勵佢融入生活，而唔係一遇到有乜問題就即刻Label佢，口講Student-centred但係執行既時候就冇諗過學生既真正需要，實際上係Teacher/School-centred。不過唔能夠無止境俾支援，協助既目標都係要學生能夠有一日自立生活，而唔係係咁俾佢要求既野佢，要佢永遠依賴。

另一樣叫我學到既野，係由佢地社工系Prof. Yip分享既。成年人同兒童/青少年一樣好大分別既野係乜？原來係大家對時間既Sense唔同。成年人少有嗰種過日子，一日復一日的感覺，因為我地有好多可以代入既角色同身份，亦都有好多隨之而來既責任，叫我地長時間響一啲已經設定既心理/工作狀態下，亦因為咁我地冇左過日子既感覺，因為我地既焦點響過去或者將來而唔係現在，所以我地好多時都係響一點與一點當中驚覺時間過去，而唔係真係感受緊時間過去 (我非常非常之有同感)。相反，小朋友/青少年就好aware現在係點，所以佢地好易悶，亦都冇一套既定既身份角色同責任，因為佢地仲摸索緊 (所以好Dynamic)，佢地比我地成年人更加「活在當下」。所以，我地成年人如果要明白兒童/青少年既世界，我地都要tune一tune我地既觀點與睇法。如果唔係，大家只不過係用緊一啲大家好似明，但其實唔明既語言黎溝通，根本就溝唔埋。

個Talk真係好Fruitful，希望可以記住同用番出黎。