呢幾個星期都冇返到聖堂, 今日好想返去祈禱, 於是下晝返到嚟冇幾耐, 就再出發去聖歐爾發堂參加傍晚六點鐘嘅彌撒。
一路上心情都好沉重, 諗起屋企嘅事, 諗起清理唔到嘅雜物, 諗起自己生活嘅改變, 諗起你... 好擔心將來嘅生活會冇咗你, 好擔心唔知道我已經係你生命嘅裏面優次有幾低, 但係我都冇得擔心, 因為我冇任何嘅位置去擔心, 就係咁我心裏若有所失, 好痛苦, 好煎熬。連自己最心愛嘅, 都彷彿要失去, 我仲有啲乜嘢快樂可言呢?
返咗天主教彌撒已經幾年, 非常熟悉當中嘅禮儀。呢份熟練讓我可以好專心咁敬拜, 畀我有機會通過禮儀同上帝對話。同時, 每一次彌撒當中嘅禱告, 我都記掛住你, 為你祈禱。短短嘅禱告時間, 你嘅名字都會喺我心中念誦, 為咗你嘅學業, 你嘅前路, 你嘅難受, 你嘅迷惘, 為咗你更認識天主, 我都不斷為你禱告。因為我真係好愛好愛你。
之前你話你唔知道點解我成日去聖堂, 除咗因為我享受彌撒嘅過程, 亦都因為我可以跪下為你祈求天主。同時, 亦都因為我喺痛苦同埋煎熬當中, 我冇任何位置可以疼惜你, 照顧你, 分享你嘅人生, 我懇求天主撫平我嘅傷痛。我好怕, 我只係你人生呢個階段嘅過客, 當再冇可以利用嘅價值嘅時候, 你就會離我而去。因為咁我一直都好痛苦, 你知唔知呀?
我只有盡量每個星期去彌撒, 我先可以有些微嘅力量面對工作, 面對家庭, 面對你。我只有盡量每星期去彌撒, 先可以為你祈禱, 係一個你唔知道嘅位置關心你, 愛你。
或者, 可能永遠都唔會知道? 又或者你知道嘅時候已經太遲。抑或你已經完全唔關心我嘅感受? 我真係好心痛!!
沒有留言:
發佈留言